पुण्यातील गुन्हेगारीची वाढती समस्या: कायदा आणि सुव्यवस्थेचं आव्हान
पुणे शहर, जे राज्याची सांस्कृतिक राजधानी आणि विद्येचं माहेरघर म्हणून ओळखलं जातं, तिथे सध्या गुन्हेगारीचं वातावरण अधिकच गडद होत आहे. कोयता गँगच्या दहशतीने शहरातील नागरिक आणि प्रशासन दोघेही त्रस्त झाले आहेत. गेल्या काही वर्षांमध्ये पुण्यात गुन्हेगारीच्या घटनांमध्ये झालेली वाढ ही चिंताजनक आहे आणि याचं ताजं उदाहरण म्हणजे वानवडी पोलीस ठाण्याचे सहायक पोलीस निरीक्षक रत्नदीप गायकवाड यांच्यावर झालेला हल्ला.
या घटनेने शहराच्या कायदा आणि सुव्यवस्थेवर गंभीर प्रश्नचिन्ह निर्माण केलं आहे. पोलीस अधिकारी जे नागरिकांच्या सुरक्षेसाठी काम करतात, त्यांच्यावरच जर असे हल्ले होत असतील, तर सामान्य नागरिकांच्या सुरक्षेचं काय? गुन्हेगारांची दहशत आणि त्यांच्या कारवायांवर नियंत्रण आणण्याचं मोठं आव्हान पोलीस प्रशासनासमोर आहे.
कोयता गँगची मुजोरी आणि त्यांच्या वाढत्या दहशतीमुळे पुण्यातील परिस्थिती अधिकच बिकट होत चालली आहे. या टोळक्यांचा बंदोबस्त करण्यासाठी आणि त्यांच्या विरोधात कठोर कारवाई करण्याची गरज आहे. परंतु, प्रश्न असा आहे की, या गुन्हेगारांना थांबवण्यासाठी पोलीस प्रशासन कितपत सक्षम आहे? गेल्या काही काळात या टोळक्यांवर कारवाई होऊनही ते पुन्हा-पुन्हा डोकं वर काढतात, यावरून हे स्पष्ट होतं की, केवळ तात्पुरत्या कारवाईने हा प्रश्न सुटणार नाही.
या घटनेनंतर पुणे पोलिसांना आता या गुन्हेगारी टोळक्यांचा कायमस्वरूपी बंदोबस्त करण्याची नितांत आवश्यकता आहे. नागरिकांमध्ये वाढत असलेल्या असुरक्षिततेच्या भावनेला आणि या टोळक्यांच्या दहशतीला आता आळा घालण्याची वेळ आली आहे. पोलिसांनी कठोर पावलं उचलून, या टोळक्यांवर अंकुश लावायला हवा. केवळ पोलीसच नव्हे, तर समाजातील सर्व घटकांनी एकत्र येऊन या गुन्हेगारी वृत्तींना थांबवायला हवं.
पुण्यातील घटनांमधून दिसत आहे की, शहरातील काही भागांमध्ये कायदा आणि सुव्यवस्थेचा प्रश्न गंभीर झाला आहे. या परिस्थितीतून बाहेर पडण्यासाठी आणि पुण्याची सुरक्षितता परत मिळवण्यासाठी प्रशासनाने सर्वतोपरी प्रयत्न करायला हवेत. अन्यथा, पुण्यातील गुन्हेगारीचं वाढतं सावट शहराच्या उज्ज्वल भविष्याला काळी किनार लावू शकतं.
- सुनील ढेपे, संपादक, पुणे लाइव्ह
