८० लाखांच्या फसवणूकप्रकरणी पणदरेच्या टोळीविरुद्ध दोषारोपपत्र दाखल!

 

पुणे : ठरवून दिलेल्या कंपनीला मालाची विक्री न करता पदाचा गैरवापर करत 'सॉफ्टहार्ट ऑटोमेशन कंपनी प्रा. लि.'ची 80 लाखांना फसवणूक केल्याप्रकरणी सात आरोपींच्या विरोधात नुकतेच दोषारोपपत्र दाखल करण्यात आले आहे. फसवणूक करणाऱ्या या टोळीतील प्रमुख आरोपी मूळचे पणदरे (ता. बारामती) येथील असून सध्या पुण्यात वास्तव्यास आहेत. 

सॉफ्टहार्ट ऑटोमेशन कंपनीच्या विक्री विभागातील माधव कल्याण जगताप (वय 36), धनश्री माधव जगताप (वय 33, दोघेही रा. मूळ पणदरे ह.मु. जय शंकर अपार्टमेंट, आंबेगाव पठार), राहुल अनिल सुलाखे (रा. साई अंगण सोसायटी, इंद्रायणीनगर), प्रशांत जयराम जगताप (35, रा. गोकुळनगर, कात्रज), पूजा सचिन जगताप (34, रा. कात्रज-कोंढवा रस्ता), मीनाक्षी कदम आणि धर्मेंद्र रामचंद्र सुतार (47, रा. वाहगाव, कराड) यांच्याविरोधात हे दोषारोपपत्र दाखल करण्यात आले आहे. 

IPC कलम 420 (फसवणूक), 408 (विश्वासघात) आणि 34 (सामूहिक सुनियोजित गुन्हा) यानुसार हे दोषारोपपत्र आहे.  2018 ते 2022 दरम्यान, हा अपहाराचा गुन्हा घडल्याची तक्रार 2024 मध्ये  कंपनीच्या अशोक विठोबा वर्षे यांनी सहकारनगर पोलिस ठाण्यात फिर्याद दिली आहे. त्यानुसार आरोपींवर गुन्हा दाखल करण्यात आला आहे. माधव कल्याण जगताप व कंपनीचे यापूर्वीचे कामगार राहुल अनिल सुलाखे, पूजा जगताप, मीनाक्षी कदम व धर्मेंद्र सुतार यांनी त्यांच्या पदाचा व अधिकाराचा गैरवापर व आपसांत संगनमत करून अपहार केला. 

फिर्यादी कार्यरत असलेल्या कंपनीच्या मालाची एका नामांकित कंपनीला विक्री न करता अन्य कंपन्यांना परस्पर विक्री केली. त्यातून आलेली 79 लाख 10 हजार 499 इतकी रक्कम कंपनीच्या खात्यावर न भरता माधव जगताप याने स्वतः, पत्नी धनश्री जगताप व मित्र प्रशांत जगताप यांच्या खात्यावर जमा करून कंपनीची फसवणूक केली. बनावट सेल्स ऑर्डर, बनावट बिलिंग, इतर कंपन्यांना माल विक्री, कंपनी ERP/टॅलीमध्ये नोंदी न करता हे पैसे स्वतःच्या/नातेवाईकांच्या खात्यात वळवले गेले. 

हा माल संजय साहू (शेजल रेफ्रिजरेशन), कॉनकॉर्ड इंजिनिअर, रनोमॅन लॉजिस्टिक्स, अक्षय एअरकॉन, रुपेश कोहली (लखनऊ) यांसारख्या विविध कंपन्यांना विकला. तपासादरम्यान सातही आरोपींची माहिती, आर्थिक व्यवहार, बँक खात्यांचे तपशील आणि मालाचा प्रवास तपासण्यात आला.

*पोलिसांनी सादर केलेले पुरावे (Submitted Evidence):*

1. बँक खात्यांचे रेकॉर्ड—ज्या खात्यांमध्ये कंपनीच्या मालाची विक्री रक्कम गुंतवली गेली.

2. विक्री झालेले माल, इव्हेंट्री लॉज, आणि माल उत्तेजनाचे पुरावे.

3. तक्रारदारांचे, साक्षीदारांचे प्रत्यक्ष जबाब आणि पंचनामे.

4. आरोपींच्या खात्यातील आर्थिक व्यवहाराचा तपशील आणि व्यवहाराचा पुरावा.

5. जप्त पंचनामा (recovery/seizure report) व मालमत्तेचे तपशील.

संपूर्ण घटनाक्रमात सलग चार वर्षे संगनमताने कंपनीचा माल व आर्थिक रकमेचा अपहार झाला. प्रत्येक व्यवहारासाठी योग्य बँक पुरावे, कागदपत्रे, साक्षीदार जबाब, आणि पंचनामे हे प्रमुख पुरावे म्हणून चार्जशीटमध्ये सादर करण्यात आले आहेत. संपूर्णत: कंपनीच्या विश्वासाचा गैरफायदा घेऊन मोठ्या प्रमाणात आर्थिक फसवणूक झाल्याचं दोषारोपपत्रात नमूद केलं आहे. 

प्रमुख आरोपी माधव जगतापविषयी

माधव जगताप सॉफ्ट हार्ड ऑटोमेशन प्रा. लि. कंपनीत 2008 ते 2022 दरम्यान सेल्स एक्झिक्युटिव्ह म्हणून काम करत होता. कंपनीतील कामाची सर्व माहिती व अधिकार त्याच्याकडे होते. त्याने संगनमताने इतर सहकाऱ्यांसह कंपनीचा इलेक्ट्रिकल कंट्रोल पॅनलसारखा माल, बनावट किंवा चुकीच्या पद्धतीने बाहेरच्या ग्राहकांना विकल्याचा आरोप आहे. उघडकीस येणाऱ्या वेगवेगळ्या व्यवहारांमध्ये चौकशी केली असता, अनेक प्रकरणांत माधवने फसवणूक व अपहार केल्याचे स्पष्ट झाले आहे. माधव जगताप हा या फसवणूक, अपहार, आणि विश्वासघात प्रकरणातील मुख्य आरोपी असून, त्याच्या नेतृत्वाखाली ही कृत्ये घडली आहेत.